【Now財經台】截至早上10時45分止，1小時內《彭博》搜尋量最多港股，依次為中國鋁業(02600)、福萊特玻璃(06865)、協鑫科技(03800)、信達生物(01801)及聯想集團(00992)。
中鋁公布業績後，AH股齊齊插水，上季稅後利潤按季大跌58%，摩根大通指表現令人失望，商品價格上升抵銷唔到銷量下跌嘅負面影響，但市場仲等緊管理層嘅解畫及未來指引，呢份業績係咪真係咁差？
資深證券分析師彭偉新指，今年鋁價處於持續上升嘅狀態，但價格上升嘅同時銷量就大跌，相信同內地經濟下行情況有關，即使國內生產總總(GDP)有正增長，但幅度依然未如理想，加上鋁和銅非常相似，都係一種基本金屬，如果經濟無辦法持續快速擴張，鋁銷量跌係無可避免，導致最後拉低埋整體業績。
佢又話，股價急跌除咗因為業績之外，仲同管理層未公布嘅未來指引有關，依家要睇返公司點樣解釋返業務數據，如果之後指示唔清晰，大行就會根據以往嘅數據作出評估，對公司前景打大折扣，股價更難以反彈。
