【now.com財經】噚日午後指數有一下高走兼創日內新高，不過由於彈高之前嘅Slow STC(14.3)未落到超賣水平，所以hit唔到噚日揀嗰隻恒指牛(57077)出動；唔緊要，市依家周一至周五都開，仲唔受天氣所限，換言之，機會多的是。
市太悶呢期可以去睇下波(係呀，作戰室都有「球迷」架！間中我哋都會講下波)。曼聯(MANU)早排輸到趴喺度之後終於都迫走咗個領隊，下一任係邊個都唔重要，重要嘅係根據我家老爺嘅「經驗」，換領隊之後嗰隊點都有三五場贏，關鍵係個賠率係點開...
至於恒指方面，牛熊證兩邊嘅街貨開始出得近返現價，槓桿都比返多少少出嚟，但望望月曆，下周二(11月5日)美國大選，同周四&五(6&7日)聯儲局議息，本來以為呢個星期似乎都要悶住過，誰不知今朝恒指開升130點，報20,729點，呢口價先將第一層熊證街貨全數收回。
開市後指數向上高走，1分鐘唔晒指數推到上20,800點樓上，連第二層嘅熊證街貨都被收回，但望清楚見指數打走呢兩層熊證夾埋都只係得74張期指街貨，做咩呀？減肥呀？
一上一落之後，咁就過咗半個鐘，五分鐘圖上見指數喺中軸上守到，同步指數亦重返於開市價水平浮沉中，Slow STC(14.3)兩線亦於高位向下回返落去中軸水平，依家作戰室都係等緊第三注點出。
小時圖上見今朝首半小時指數行出一個「射擊之星」嘅形態，不過擺位唔算高啫，但同步亦都喺小時圖上生出「圓底」，暫時未見上破頸線。而小時圖下方嗰堆平均線仍然健在，係Slow STC(14.3)個樣有啲衰。
依家10點15分，五分鐘圖上見指數企喺中軸都守咗一段時間，保歷加通道口保持平衡中，即Swing Trade有條件出現，真係關鍵在於指數係借中軸做底還是落到保歷加底線先借做底。
恒指牛(57470)，收回價20,348點，同現價有約356點距離，拉近啲取槓桿高啲，呢隻有約44.1倍，成交活躍，反正都係等邊條線有支持Swing返上去，所以執定隻好倉先。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
