【Now財經台】截至早上11時止，1小時內《彭博》用戶搜尋量最多港股，依次為長城汽車(02333)、中國石油股份(00857)、中國海洋石油(00883)、協鑫科技(03800)及舜宇光學科技(02382)。
協鑫科技發盈警，預期上季虧損繼續維持近15億人仔，按季冇乜改善，首3季暫時累計蝕近30億人仔。公司發盈警後，今日(28日)一度挫逾5%，低見1.62元。早前，光伏股炒咗上去，到依家仍然跌唔落，係咪市場繼續憧憬行業有轉機？
富昌證券聯席董事譚朗蔚指，如果行業睇到曙光，會對股價有支持，但佢坦言對光伏股及新能源股睇法比較審慎，因為上周炒作美國撤銷內地光伏產品「雙反稅」等傳聞，但到依家都未證實到。
Stevan提醒，如果呢啲傳聞炒咗幾個星期都仍未見落實，就要睇返基本因素，例如公司仍蝕緊錢，而過去幾年過剩嘅產能仍未消化晒，以及產品價格一直下滑等，呢啲因素都會係光伏股值唔值得憧憬。佢認為，協鑫科技、信義光能(00968)、福萊特玻璃(06865)純粹跌浪反彈，唔適宜沾手。
