【Now財經台】日本自民黨及公明黨15年以來，首次喺大選中攞唔到過半數議席，在野黨就大勝，攞到250席，首相石破茂表明無意辭職，又話現時唔考慮擴大執政聯盟，希望透過穩定政治局勢嚟承擔責任。不過，在野黨對手野田佳彥表明會再爭相位，尋求建立一個可以推翻自民黨嘅反對派聯盟。日本政局唔明朗，加上美國總統大選下星期就會舉行，美匯指數居高不下，日圓今日嘅跌勢，係咪都唔足以反映晒短期嘅不明朗因素？
東亞銀行財富管理部高級投資策略師黃燕娥指，今日(28日)美元兌日圓一度見153.87，而日圓近期的確比較弱，今次選舉結果預示未來日本經濟及貨幣政策都會傾向審慎，而石破茂上任後都講過，依家唔係加息嘅好時機。
佢又話，可以預期日央行未來加息步伐只會更慢，加上美元及美債息進一步向上，導致日圓跌至現水平，不過，由於其他央行都開始減息，所以即使日央行唔係太進取加息，都會對日圓有支持，因為會令息差收窄，如果想做日圓中長線部署，不妨考慮喺現水平或下一個阻力，即147水平，逐步吸納日圓。
