【Now財經台】日本眾議院選舉結束，自民黨領導嘅執政聯盟大敗，攞到嘅議席唔過半，黨魁兼首相石破茂可能因今次大敗被黨內追究責任，相位危危乎，如果佢真係辭職，日圓可能會繼續跌，日圓兌美元喺今日(28日)亞洲交易時段跌至3個月低位，每百日圓兌港元跌穿5.1算，喺5.071水平上落。不過，日本股市今日大升，日經平均指一度勁升逾800點，高見38717點，點分析投資市場對選舉結果嘅反應？政治不明朗因素增加，會唔會令日圓更波動？
富達國際投資策略董事簡立恒指，短期內冇政黨可以取得大比數議席，令政治不確定性增加，繼而反映喺日圓上。佢又指，其實市場早已預期自民黨會喺呢場選戰失利，只係結果比預期差，令日圓弱勢。
佢續指，日央行之前已加咗兩次息，美國聯儲局亦開始減息，美日息差有助緩和日圓跌勢，不過，日圓再跌至之前低位嘅機會唔大。
