【Now財經台】汽車街(02443)股價今日(24日)高開9%後，曾短暫倒跌，之後重拾升勢，並愈升愈有，臨近中午最多飆61%，高見41元，之後升幅收窄，尾市一度急墜，收市報27.3元，升逾7%。
值得留意係，中央結算系統嘅股數僅1500萬股，但今日成交股數逾6400萬股，換手率相當驚人，較過去100日同時段平均大增17倍，係上市以來最大單日成交。
汽車街喺5月底上市，現有股東連同首次公開招募前(pre-IPO)投資者，合共持有約86%股份，禁售期將於11月27日屆滿，上市價10.2元，若以今日收市價計，已升咗2倍，有好大獲利沽貨誘因。
雖然唔排除會有資金再炒高啲才沽貨，但汽車街上半年收入跌15%，經調整盈利更倒退35%，基本面未必支持到股價強勢，加上股價今日先抽高，臨近尾市自高位急墜，投資者要小心嚟緊嘅波動性。
