【Now財經台】體育用品股李寧(02331)公布銷售數據，雖然零售流水按年錄得中單位數跌幅，但仍獲摩根大通唱好。體育用品股今日(24日)普遍向下，僅李寧股價有得升，一度升逾2%，點解銷售數據一般，股價今日仍可以逆市升？
艾德金融執行董事陳政深指，李寧股價10月初見過高位，上過20元樓上，其後反覆向下兼穿位，通常穿位股份都會出現技術反彈，相對強弱指數(RSI)亦轉弱，依家李寧唔係跑贏大市，只係出現單日反彈。
宏觀環境方面，Ryan續指，不論係體育用品行業，還是零售業，需求都好疲弱，體育用品股都唔可以獨善其身，呢類股份個別喺10月初造好，係因為市場憧憬內地出台一系列刺激經濟措施，有利體育用品股，當時李寧股價抽升，但呢類消息都比較短暫，所以股價之後都自高位回落。
