【Now財經台】廣核集團旗下嘅中廣核礦業(01164)以經營天然鈾貿易為主，股價今日(22日)一度升近24%，天然鈾係核電最主要燃料，雖然集團上半年天然鈾業務業績由盈轉虧，但天然鈾現貨價格仍處於高水平，其實中廣核礦業嘅收入分布，內地市場只佔23%，其餘都係美國、歐洲、英國等地，係咪真係值得憧憬？
信達國際研究部董事趙晞文指，應該要留意返企業處於產業鏈嘅邊個位置，如果只係喺上游做開採嘅部分，而天然鈾價格長期處於高位，當然係有利企業嘅好事，但做貿易就唔同，因為買返嚟係要再轉手，利潤相比做純上游嘅開採會較低。
晞文續指，核資源係相對較稀缺嘅元素，以往都有唔同嘅國家爭緊核資源，所以要諗返潛在風險點。既然國際間嘅貿易關係緊張，咁限制企業喺境外採購核資源都會係潛在風險點。佢指出，歐美收入佔比50%，始終機遇同風險點並存，亦解釋到鈾相關股點解不時有炒作，值得憧憬。
