【Now財經台】金價昨晚(16日)終於升穿每盎司2670美元嘅短期阻力，更反覆逼近歷史高位，喺今日(17日)亞洲交易時段升至逾2685美元，創新高，但破頂後似乎再遇阻，係咪暫時唔夠催化劑再推升金價？
獨立商品外匯分析師熊俊傑指，未必係唔夠催化劑，反而係歐洲央行今晚(17日)將會議息，匯價波動令金價有不確定性，要留意議息結果及官員嘅取態，但值得留意係，金價破頂之際，美匯指數亦向上，反映金價不單受美元牽動，亦受環球息口愈來愈低影響，大部分主要央行傾向減息為金價帶來支持。
Ken預期，金價中短線會繼續強勢，估計2800美元水平係另一個阻力，要留意金價能否企穩2680美元樓上，較穩陣嘅投資者可以等市場消化咗相關因素再做部署，始終今晚歐央行議息後，金價可能會出現較大波動。
