【Now財經台】《施政報告》有多項針對樓市嘅措施，包括優化「新資本投資者入境計劃」，昨日(16日)起可買5000萬元嘅豪宅，又放寬住宅按揭上限至70%，非自用及首置客都有份。不過，有大行認為，放寬樓按對整體樓市幫助唔大，但可以帶動豪宅成交，由於發展商庫存水平高企，所以二手樓價仍要跌，到底呢啲措施係咪對樓市整體氣氛冇乜幫助？
恒生銀行首席經濟師薛俊昇認為，過去每當樓市熾熱時，政府都會收緊按揭成數，供樓負擔亦有限制，依家樓市調整，繼之前「撤辣」後，政府提高按揭成數同供樓對入息比率，某程度上可視為逆周期措施。
Thomas又話，對於投資移民買樓方面，政府一方面希望投資移民喺香港置業定居，但又要避免刺激一般市民置業需求，所以限制投資移民只可以買豪宅，但對整體樓市嚟講，經歷調整後，加上政府嘅政策措施，大方向都係希望樓市可以平穩發展，希望樓市回穩會對整體經濟有幫助。
