【Now財經台】美股昨晚(15日)結束兩連升，周一(14日)造好嘅晶片股昨晚都轉差，其中，人工智能(AI)晶片「股王」英偉達(Nvidia)挫5%，主要受艾斯摩爾(ASML)業績拖累，ASML荷蘭股價喺放榜後急瀉15%，ASML原本今日(16日)派成績表，但因為技術問題提早1日出爐，呢份季績差過市場預期，上季定單量僅及分析員預期一半，前景指引亦偏弱，對人工智能(AI)行業有咩啟示？
潤淼資產管理董事盧志威表示，ASML嘅問題在於美國實施出口管制，增加ASML喺內地銷售產品嘅難度，其次係面對周期性問題，ASML係光刻機巨頭，公司定單出現波動，令市場質疑上游受惠唔到AI熱潮，又或者熱潮只集中喺某啲產品，例如Nvidia某幾款晶片，而其他AI相關嘅產品仍未能受惠。
