【Now財經台】停牌近兩年嘅中國通才教育(02175)今日(15日)復牌低開近51%後，跌幅一度擴大至逾64%，低見1.11元，成交金額逾800萬元。
集團喺2021年11月底停牌，因當時接獲有關新股發行及集資用途嘅指控，須安排專家進行獨立調查，因而無法完成審計工作，亦未能刊發之後嘅業績。
中國通才教育停牌近兩年，難得等到「逃生門」打開，小股東今朝即刻沽貨走人，導致股價今日大裂口下跌，創1.11元嘅上市新低，雖然有啲買盤，但要重建投資者信心絕對唔易，相信要補返呢個裂口恐怕都要好長時間，重上IPO價3.69元樓上就更加唔使諗住。
