【Now財經台】東軟教育(09616)股價今日(14日)低開近6%後，跌幅一度擴大至逾10%，低見2.41元，成交股數較過去100日同時段平均增9倍，成交金額逾370萬。
公司昨晚(13日)出咗兩份通告，包括新學年新生報到人數按年升幅收窄至1.3%，以及新購入地皮將會興建東軟教育健康醫療科技園。不過，東軟股價今日反應差，可能同市場擔心公司財政狀況有關，據中期業績顯示，公司只有8.75億人仔現金，但用咗2.66億人仔買地皮。
東軟股價今日一度失守20天、50天及250天線，但喺低位有買盤吸納，開出一條好長嘅下影線，要留意未來幾日守唔守得住保歷加通道中軸，即2.54元水平，一旦失守，有機會下試通道底，即2.1元水平。
