【Now財經台】港府昨日(9日)同內地簽署《〈內地與香港關於建立更緊密經貿關係安排〉服務貿易協議》(CEPA)協議二，其中，會放寬本港電影、電視喺內地嘅投資限制，影視股今日(10日)即時有反應，電視方面，香港製作嘅引進劇經國家廣播電視總局批准後，可以喺內地廣播電視台黃金時段播出，明年3月起生效，估計電視廣播(TVB)(00511)會最受惠，依家內地收入佔整體25%，加上集團9月底完成向邵氏兄弟廣發全球配股集資，TVB係咪有望加快扭虧？
耀才證券研究部總監植耀輝指，影視股鮮有正面消息，所以今次消息一出就炒得比較熾熱，其中，TVB股價今日一度炒高25%，放寛政策後，TVB業務規模可做大啲，市場空間大咗，的確係一個利好因素，但能唔能夠把握今次機會，就要視乎劇集嘅對內地人嘅吸引程度，先可以判斷係咪加快扭虧，此外，亦要考慮成本可能會增加呢個因素。
