【Now財經台】中國平安(02318)股價自高位60元水平,連續兩日大幅回調後,今早(10日)出現反彈,一度升逾8%,高見52.15元,上返50元樓上,今日細價牛證較受歡迎,距離收回價10%,槓桿差唔多9倍,呢批牛證係咪較好嘅選擇?
滙豐亞太區財富管理香港上市產品銷售經理盧貴良指,人民銀行今日再出招,推出「證券、基金、保險公司互換便利」(SFISF),首期操作規模5000億人仔,券商或險企可以將資產作抵押,轉換流動性較高嘅資產,消息推高平保股價,但平保股價近日都跌得比較多,市場上都有唔錯嘅牛證可以選擇。
佢又話,投資者可以揀成交活躍、距離收回價10%嘅牛證,收回價約45元,即股價今年5月頂部,若跌穿呢個位,可以先行止蝕。