【now.com財經】噚日揀咗隻恒指熊(54381)出嚟，已經寫嗰時見指數由升轉跌，嬲到回唔到氣咁滯。
以噚日Patreon出文時間10點6分，如常的用10分鐘作為睇文時間的話，則於10點16分再睇返個走勢圖，小時圖見指數仍然擺位低於50線以下，仲有似向痴鬼線嘅100線出發；換保歷加通道則見仍然拓闊中，Slow STC(14.3)仍然有得出超賣再超賣條件。借呢個向下嘅條件仍在而出(54381)。
如常的用10分鐘作為買貨時間的話，期內高低位做過0.125元/0.11元計，平均買入價為0.1175元。
落場後指數一級一級向下再落，去到上半場最後半小時完場見小時圖出咗「十字星」。Slow STC(14.3)兩線係仲處於超賣水平，不過見到咁嘅樣都知(54381)係時侯起身。
換個五分鐘圖見指數於11點30分重新上返10線，Slow STC(14.3)亦已經出觸底，用返平時策略玩嘅話，亦都係一個收割嘅時侯。
幾時都係我收割好過被人收割嘅。同以10分鐘作為走貨時間的話，按期內高低位做過0.167元/0.144元，平均走貨價為0.1555元，呢一趟平均執24.44%。
睇返噚日上半場指數以一浪低一浪嘅姿態向下運行，真係唔好以為指數好似以前咁細波幅，呢一上一落隨時都執到十幾至幾十格，動作快嘅戰友就係咁來來回回咁出，你眼見佢哋食得爽但其實佢都有付出：隻手同眼睛真係會攰架。
記得聽日係重陽節，紅日假期港股唔開架，變相如果今日過夜嘅話就要過兩日夜啦。
連跌兩日之後恒指，已經畫定9月26日嘅裂口底部19,954點架啦，還好今日指數都開升返409點，報21,046點，作戰室好倉早已預備，依家9點42分，大波幅上行之下爬嘅格仔由平時嘅幾格變成依家一爬爬十幾廿格。爽。
小時圖上其實已經見到指數由前起同Slow STC(14.3)玩觸底向下，回到落去噚日下半場亦都見有觸底走勢，拉到底線大約20,500點位置。今朝指數裂口上跳返上10線樓上，用返呢條10線作為下方量度線同時，Mark住上面20線先亦都可以。
依家9點48分，指數高開高走一度升逾700點。喺五分鐘圖上見指數上影線掂住150線之後，暫時未有再向上作突破，Slow STC(14.3)兩線都上到超買位，保歷加通道口係仲拓闊，有條件比Slow STC(14.3)出超買再超買，但似乎都要等一等10線上嚟借到力咁先至過到線。
換一換個保歷加通道見底線有少少向上，「出Swing咪無得再上囉？」未必嘅，問題在於佢借邊兩條線行Swing啫。
五分鐘圖借得到10線而上嘅，恒指牛(52297)，收回價20,150點，同現價有約913點距離，槓桿有約19倍，雖然有其他牛證嘅槓桿比佢高，但佢勝在街貨低。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
