【Now財經台】科濟藥業(02171)股價今日(9日)早段受壓，但下晝出咗通告後轉升，一度高見5.46元，大升逾24%，收市報4.5元，僅升2.5%，成交股數較過去100日同時段平均增7倍，成交金額逾1億元。
科濟發通告指，集團位於美國嘅生產基地，以零缺陷通過美國食品藥監局(FDA)核查，預期FDA會喺30日內回覆，是否解除CT053、CT041及CT071臨床試驗暫停要求。
其實CT053年初已喺內地上市，帶挈集團上半年錄得逾600萬人仔收入，呢隻藥連同CT041喺美國已進入第2至第3期試驗，一旦重啟試驗，將會加快研發及商業化進程，但現時全球最少有12款使用CAR-T相關產品，所以競爭好大。
科濟股價近期反彈，現時市值僅約25億元，遠低於恒生綜合小型股指數市值最少40億元嘅要求，有機會被剔出港股通。
