【Now財經台】A股昨日(8日)復市，發改委同日開記招，但政策憧憬落空，拖累港股「股災式」急瀉，單日瀉逾2000點，以點數計，破咗2008年金融海嘯時嘅紀錄，依家港股有唔少股份估值偏低，如果想執平貨應該點揀？又要避開邊類股份？
「股市漁夫」創辦人莊志雄指，港股昨日(8日)先升穿150天線，大市震倉後，跌穿150天線嘅股份唔係首選，因為呢類股份比較落後，當市寬向下，落後嘅股票就會先跌，其中，雖然科技板塊強勢，但網易(09999)及騰訊音樂(01698)屬於落後嘅科技股，除非可以短時間內上返150天線，否則，唔係科技板塊首選。
佢又指，美高梅中國(02282)等賭股都係較落後嘅股份，但唔建議用賭股追落後，因為賭股波幅大，亦隨時會出現「遲升先跌」嘅情況。
Lewis續指，要避開內房板塊，因為要有好大量資金先可以救得晒所有內房股，而救市資金唔係一次過放出，難以拯救所有內房股，佢又提醒，內房股最容易賺錢嘅時間已經過咗，之後就會有較大嘅波幅，亦難以揀中安全嘅股份。
