【Now財經台】昊天國際建投(01341)今日高開2%後，曾短暫倒跌，但好快重拾升勢，一度勁升36%，高見0.64元，但之後升幅不斷縮，更幾乎打回原形，成交股數逾2.3億股，較過去100日同時段平均成交激增49倍，成交金額逾1億元。
昊天上周以每股0.4元，較上個交易日收市價，折讓21%，配股集資6億元，話用作潛在投資、發展位於亞洲嘅電動車及充電業務，以及現有業務等，似乎公司都想將業務再做大啲。
集團股價近日一直可以企穩配股價樓上，但今朝抽升後，企唔穩50天線之餘，更出現1條好長嘅上影線，想進一步補返8月中嘅大陰燭下跌裂口都有一定難度。
