【Now財經台】內地股市明日(8日)長假後復市，發改委明日早上10點將會開記者會，介紹落實一籃子增量政策，推動經濟持續發展。花旗估計，內地將推出規模約3萬億人仔嘅刺激消費政策，中央係咪想透過財政政策刺激消費，希望擺脫通縮局面？
博威環球證券金融首席分析師聶振邦認為，花旗估計嗰3萬億人仔，應該唔會全部用嚟刺激消費，估計約5000億人仔用嚟谷消費，其他主要用作改善民生狀況及減稅，令市民資金更鬆動。
聶Sir又話，A股及港股強勢已帶動財富效應，不論會唔會派消費券，只要AH股繼續升，都對內地消費行情帶嚟間接幫助。
佢估計，明日A股復市將有大量股份漲停板，由於「十一黃金周」期間港股繼續開市，A股就假期休市，由於中資股已升咗一浸，相信大量內地投資者會蜂擁入市，A股未來一兩個交易日應該會漲停。
