【Now財經台】嘉和生物(06998)今日(7日)復牌股價急升，一度勁升近97%，高見3.25元，公司公布同億騰醫藥合併，成為公司全資附屬。由於億騰價值較高，因此，嘉和生物屬於反向收購，點理解嘉和生物今次「蛇吞象」？
《香港股票財技密碼》作者梁杰文認為，嘉和生物復牌前市值唔夠10億元，但今次就透過發新股收購億騰，今次「蛇吞象」非常罕見，因為近年港交所(00388)修改上市規則，涉及控股權轉讓嘅重大收購，流程及要求同IPO一樣，因此，大部分大公司會索性做IPO，因為可以即時籌集新資金。
Mike相信，B仔股最壞情況已經過咗，2021年股市熱潮退卻，市場認清B仔股嘅真面目係賺唔到錢，股價就回歸理性，加上美國息口掉頭向下，對醫藥股有一定幫助。今次嘉和生物同億騰合併帶挈股價彈起，但要上返上市價24元基本上冇乜可能，反而藉消息炒高股價，輸少當贏之下，吼位「落車」止蝕。
