【Now財經台】美元上升，非美貨幣就繼續跌，上周至今，日圓係跌幅最大嘅十國集團(G10)貨幣，上周更錄得15年以來最大跌幅，除日股連日向上外，新任首相石破茂更不斷「放鴿」，話會繼續推進政策，確保日本可以擺脫通縮，進一步確認短期內加息無望。新任財務大臣就「出口術」，話正切關注匯率走勢帶嚟嘅影響，又指會適時出手，日圓一度逼近150水平，見8月中水平，呢啲位有冇支持？
光大證券國際環球市場及外匯策略師湯麗鴻指，日圓近期走勢都幾反覆，石破茂言論彈出彈入，佢未做首相前其實係幾「鷹派」，日本今年3月第1次加息時，佢係公開撐加息，不過，做咗首相後，同日央行行長植田和男會面後，言論又轉為「鴿派」。
Kimmy又話，近期美元及日圓走勢的確幾反覆，日圓由142水平到今日(7日)試過149水平，日央行今個月好大機會按兵不動，未必會再加息及減少買債，所以就要睇下美國聯儲局有咩行動，佢認為，日本官員現階段都係以「出口術」為主，希望以「鷹派」言論阻止日圓繼續貶值，而150係一個好重要嘅心理關口，佢估計，日圓短期會喺142至150上落。
