【Now財經台】停牌3個星期嘅B仔股嘉和生物(06998)今朝(7日)復牌，集團公布被反向收購，股價高開近88%後，升幅一度擴大至近97%，高見3.25元，成交股數逾800萬股，較過去100日同時段平均激增95倍。
嘉和生物旗下1家全資附屬會併入億騰醫藥，嘉和生物會向億騰股東發新股支付交易，所以不涉及現金支出，每股2.899元，較嘉和生物停牌前有75%溢價，交易完成後，嘉和生物會改名為億騰嘉和醫藥。
雖然嘉和生物上市已4年，但仍未「甩B」，即是仍然係1家蝕錢嘅生物科技企業，交易仍有待股東特別大會通過，但已獲近15%持股股東作出不可撤回承諾支持呢單交易。
嘉和生物股價今日升至年半高位，要留意億騰大股東接手後，雙方會唔會產生更大協同效應，同埋睇下幫唔幫到嘉和生物產品商業化，甚至轉為賺錢成功「甩B」。
