【Now財經台】港股唞咗1日，今日(4日)又升過，不過，航運股今日「沉船」，其中，東方海外國際(00316)係表現最差藍籌，市場一直估計美國碼頭工人罷工事件會持續一段時間，但今日突然宣布傾掂數，工人已經同營運商達成加薪協議，結束只維持咗3日嘅罷工行動，東方海外股價自9月起，一直跟隨運費指數上升，罷工問題火速解決，係咪意味股價要打回原形，落返91元水平？
紅蟻資本投資總監李澤銘指，今次碼頭罷工事件只持續數日，運費其實唔太受惠，始終對運費影響唔大，加上整體商品貿易及集裝商需求疲弱，導致全球貨運量向下，不過，經過今次事件後，市場或對航運股有唔同憧憬。
Alan又話，最近航運股反彈，主要係股價見底反彈及受惠於大市升勢，估計東方海外或中遠海控(01919)等集裝商股，短期會有調整壓力。
