【股市脈搏】未來世界有貨難甩身

【Now財經台】未來世界控股(00572)股價今日(3日)高開逾12%，開市報0.74元，但已經係暫時低位，其後升幅一度擴大至逾51%，高見1元。

公司昨晚(2日)發通告，話斥資1500萬人仔收購深圳美鏈行物業管理全部股權，雖然美鏈行去年仲蝕緊約370萬人仔，但喺中央傾力救樓市下，物管公司生意可能會有起色。

雖然未來世界今日大升，但距離今年高位1.25元，仲有段距離，加上平日成交唔多，有貨嘅投資者想走貨應該都唔易。