【Now財經台】港股今日(2日)已經連升第6個交易日，恒生指數再勁升逾千點，大市升到唔識停，內房及物管股癲升，滙豐證券上調碧桂園服務(06098)目標價33%至6.1元，世茂服務(00873)目標價更調高逾37%至1.1元，但值得留意係，目標價仍低過現價，到底物管股值唔值博？
元宇證券投資總監林嘉麒指，現時物管股比內房股值博，由於內地經濟唔理想，物管股最多只能維持穩定嘅管理服務收入，不過，呢類公司唔使擔心受內房股債務違約等原因拖累，變相估值有上升空間。
KK又話，早前物管股主要受內房拖累，但實質影響其實唔大，仍算穩健，如果投資者唔係想博超高投資回報，可以考慮揀碧服、融創服務(01516)呢兩隻上升空間應該相對大嘅物管股。
