【Now財經台】截至早上10時45分止，1小時內《彭博》搜尋量最多港股，依次為融創中國(01918)、世茂集團(00813)、郵儲銀行(01658)、中國海外發展(00688)及旭輝控股集團(00884)。
房地產研究機構克而瑞估計，100強內房銷售今個月會止跌回穩，滙豐證券更一口氣大幅上調20隻內房及物管股目標價，睇好今輪反彈可以持續較長時間，世茂、旭輝股價喺4個交易日內最少翻倍，係咪反映咗一系列政策出台後，真係可以扭轉內房劣勢？
資深證券分析師彭偉新指，依家主要睇兩個因素，包括政策方面，無論任何政策，只要唔干預內房市場，投資者普遍都會有正面睇法，但可唔可以提升市民買樓意欲，始終要睇內地實際經濟狀況。
佢又話，內房市場供過於求嘅情況已持續幾年，之後內房「爆煲」導致好多公司還唔到錢，睇返銷售數據，按年大跌60%至80%，所以唔可能因為有重磅政策出台，銷售就立即爆升，內房股短期係會有反彈，但銷售、業績交唔交到功課仍要觀望。
