【Now財經台】停牌1個月嘅新威國際(00058)今日(30日)復牌，股價一度飆逾3倍，但公司財務狀況一直唔理想，仍然蝕緊錢，僅持有逾700萬元現金，近年靠向控股股東詹培忠借錢交租、出糧及其他行政開支等，但唔使抵押品及畀利息，集團今次向他發可換股債券(CB)，籌約3000萬元，由於公司欠詹培忠逾2200萬元，所以詹培忠只需付逾700萬元現金。此外，公司又會以96%溢價向詹培忠發新股，交易完成後，持股量將升至逾50%，須提出強制無條件現金要約。但值得留意係，詹培忠仍有官司在身，如果佢將來想賣殼會唔會有影響？
《香港股票財技密碼》作者梁杰文指，有機會影響詹培忠入主新威，但絕對唔影響往後轉售公司業務，始終「金牌莊家」喺市場上有較高知名度，容易揾到買家，加上公司似乎有意做債轉股，由借錢應付交租、出糧，再以低價發CB，變相提升詹培忠喺新威嘅控股權，令市場對公司有更多憧憬。
