【Now財經台】內地上周祭出「組合拳」救經濟，具體政策亦逐步落地，上海、深圳、廣州今日(30日)起放寬樓市限購，上海及深圳首套房最低首付比例降至15%。樓市政策放寬後，可唔可以再憧憬「金九銀十」？內房股已自低位反彈咗唔少，後市係咪可以繼續升？資金係咪會持續流入內房股？
星展銀行(香港)豐盛私人客戶執行董事鄧威信指，投資樓市嘅氣氛有改善，一線城市放寬限購令、降低首付比例等措施全部一齊出台，會引起市場關注。早前，內地市道低迷，居民將存款放喺銀行，但隨著銀行息率下降，加上刺激樓市政策配合下，市民就會將資金投入返股市或樓市，Wilson估計，內地房地產市場未來會旺返好多。
佢又話，政策出台後，資金追入內房，帶挈內房板塊飆升，內房股本身估值平，加上放寬樓市政策，市民購房信心逐漸回復，內房股有進一步上升空間。
