【Now財經台】人民銀行昨日(24日)聯同國家金監總局及中證監推出一系列刺激經濟措施，救市「組合拳」刺激A股及港股大升，市場亦睇好後市表現，主要係今次嘅救市措施中，有兩大新招撐股市，分別係互換便利首期操作規模5000億元(人民幣‧下同)，以及股票回購再貸款3000億元，合共向股市定向「放水」8000億元，究竟當中產生嘅連鎖效應有幾大？成效又可以持續幾耐？
潤淼資產管理董事盧志威指，動用8000億元撐股市會有乘數效應，因為保險公司會係其中1類受惠企業，有利A股向上。至於成效可以持續幾耐，因為臨近「十一國慶」，放假期間A股冇市，即係港股冇北水，股市喺呢段期間或會出現調整，令定向「放水」成效冇咁顯著，所以短期會出現獲利回套情況，相信要等國慶假期結束後，先真正睇到「放水」成效。
