【Now財經台】人民銀行、金監總局及中證監今早(24日)舉行聯合發布會,再出「組合拳」救市,包括下調存款準備金率(RRR)及減存量房貸息等,刺激港股及A股抽升,今年1月24日中央宣布要降準及出手救內房,當日令港股及A股展開一輪反彈浪,今次會唔會歷史重演?有咩政策最值得留意?
獨立股評人王榮昆指,市場喺美國聯儲局減息後,對降準及下調存量房貸利率有好強嘅呼聲,只係人行喺今日公布前完全冇作出任何暗示,所以今日宣布降準、減首次房貸及存量房貸息,其實都唔係會令市場太意外嘅招數。
James續指,人行構建嘅利率通道係睇RRR,即人行將資金批發比大行同重要銀行,所以係人行本身嘅資金成本。
此外,要睇唔同日期嘅逆回購、中期借貸便利(MLF)及常設借貸便利(SLF),即銀行向人行攞資金返嚟嘅資金成本,之前市場貸款報價利率(LPR)係政策利率基準,但估計由喺上海陸家嘴金融會議後,反映LPR唔再係非常重要嘅政策。
佢又補充,雖然人行昨日(23日)下調14日期逆回購操作利率0.1個百分點,但市場普遍認為係兩個月前嘅減息周期尾聲,當時7日期逆回購利率搶閘下調,其後唔同年期嘅LPR及MLF再跟住減,最後輪到14日期逆回購操作利率,反映人行認為7日期逆回購操作利率係最緊要。佢補充,今日下調7日期逆回購操作利率0.2個百分點,係非常重要同利好訊號,依家美國聯儲局已做咗部署,令人行操作空間又大咗。