【Now財經台】昇能集團(02459)月初被證監會點名指股權高度集中，股價單日暴瀉98%，公司上周五(20日)收市後公布以先舊後新方式，配售最多5000萬股，佔擴大後股本約4.72%，配股價0.325元，折讓約13%，呢個配股價係咪合理？散戶應唔應上車？
《香港股票財技密碼》作者梁杰文指，大股東被斬倉後，亦有喺個別日子沽貨，當時沽貨價見過0.4元至0.5元，相對今次認購股份配售價0.3元，有高沽低賣嘅情況。佢估計，昇能今次未必係最後一次配股，未來有可能再喺低位配股，所以要留意事態發展，才知道大股東部署上係咪高賣再喺低位買貨。
Mike又話，昇能半年業績差，收入倒退，經營狀況處於虧損狀態，係典型新股上市後見真章嘅例子，由有利潤變蝕錢。之前投資者炒憧憬公司納入指數成分股，但證監會點名後，股權分散咗，加上依家喺低位配股，建議投資者繼續觀望，唔好入場博反彈。
