【Now財經台】出門問問(02438)股價上周五(20日)喺大成交下飆59%，由毫子股變返蚊股，股價今朝(23日)低開4%後，跌幅一度擴大至逾13%，低見1.05元，但今朝10時前突然有買盤湧入，帶動股價由跌轉升，一度倒升18%，高見1.43元，雖然暫時成交唔及上周五活躍，但截至今早11時30分止，成交金額已較過去100日同時段平均增逾3倍。
作為本港生成式人工智能(Generative AI)第1股嘅出門問問，今年4月底以3.8元上市，股價初期曾借Generative AI概念炒起，但5月底開始出現沽壓，加上上市後首份中期業績收入跌，虧損又擴大1.7倍，之後股價一直向下，9月中仲創上市新低，慘變毫子股。
睇返股權分布，控股股東兼創辦人李志飛係Google前科學家，現時持股量約25%，Google母公司Alphabet係公司上市前投資者，持股量逾12%，加埋其他上市前投資者持股逾50%，街貨唔夠30%，留意近日股價及成交異動，係咪同解禁股有關，基石投資者及上市前投資者為期半年嘅股份禁售期將會喺10月底屆滿，投資者想追入都要小心。
