【Now財經台】美國聯儲局上周宣布大手減息0.5厘，局方強調係為咗穩定就業市場，如果從經濟基本面睇，係咪需要一開始就減息0.5厘？如果未來減息幅度細咗，會唔會令市場出現波動？
東亞銀行首席經濟師蔡永雄指，其實市場上都有聲音認為聯儲局要減息0.5厘，因為7月議息時冇減息，令減息周期遲咗啟動，減息前聯邦基金利率介乎5厘至5.25厘，當時核心個人消費開支(PCE)約2.6%，已自高位回落，企業招聘步伐放慢，失業率喺短短幾個月間，由年初3.7%升至4.2%，加上非農就業職位大減，反映就業市場放緩速度較快，所以聯儲局認為利率唔需要企喺咁高水平，所以大手減息0.5厘，希望令利率重返一個中性水平。
Ricky又話，聯儲局將於11月再議息，開會前仍兩次就業數據將會公布，如果數據唔太差，相信下次好大機會減息0.25厘。不過，若就業數據失速，聯儲局就會再減息0.5厘，整體嚟講，由於聯儲局希望美國經濟能成功「軟著陸」，所以會循序漸進地減息。
