【Now財經台】今年8月曾減息0.25厘嘅英倫銀行，宣布維持利率不變，符合預期，行長貝利(Andrew Bailey)指，減息唔可以太快或過度，又強調會逐步下調利率。美國聯儲局日前開始減息，歐洲央行亦喺6月及9月都宣布減息，環球主要央行係咪已正式步入減息周期？投資者嘅風險組合需唔需要作出相應調整？
渣打香港財富方案高級投資策略師陳正犖指，相信除咗日本央行，其他主要央行都會行寬鬆政策，確認步入減息周期後，會對整體風險資產市場有幫助，定息產品呢個月跌咗好多，又指揸Cash一定冇咁著數。整體資產方面，陳正犖提醒投資者一定要留意債券，以美國國債交易所買賣基金(ETF)為例，10年期債息3.8厘呢個大位，係過去10個月都守得住，但依家連3.6厘都跌穿埋，而2年期債息喺過去3個月已累跌1.3厘，佢認為市場現時反應過度，建議喺接近3.8厘可以開始分段吸納。
