【Now財經台】美國聯儲局大手減息，有利港股高Beta股及科技股，但美國科技七雄(Magnificent 7)不升反跌，點解估值落後嘅中資科技股，反而可受惠於美國減息？
光大財富證券策略師伍禮賢指，科技股持續強勢未必只係同息口有關，過去幾年，大型科技股累積較大調整幅度，睇返基本面，大型科技股過去幾季業績整體表現都較正路，加上對比外圍大型科技股，港股嘅科技股估值始終有落後嘅優勢，不過，長遠有利資金由高估值市場，回流至低估值或便宜嘅市場，佢又相信，只要未來資金流入最落後科技股，本港科技股就有機會受惠。
Kenny補充，雖然減息因素未必對上市科技股嘅業務性質方面帶嚟明顯變化，但當利率環境向下，就算科技股收入及利潤冇大改變，對於科技股嘅估值計算方法都會有明顯提升，因為科技股普遍有較多收入或利潤會放喺未來，所以高估值股份都會對息口敏感，佢相信，以上因素先至係科技股今日升勢咁全面嘅因素。
