【Now財經台】據《路透》引述洲際交易所(ICE)數據，睇淡倫敦布蘭特期油嘅期貨合約有16.4萬張，睇好就有15.1萬張，反映市場參與者對油價睇得較淡，不過，受颶風弗朗辛(Francine)吹襲美國墨西哥灣影響，布油由每桶70美元樓下，彈上約73美元水平，期貨合約數字能否準確預視油價走勢？
艾德金融投資策略總監文錦輝指，油市通常都係淡倉較多，以往布油同紐約期油嘅倉位差唔多，但今次布油不論睇好或睇淡嘅倉位都比平時大，咁多淡倉但遇上風暴消息，加上一旦整體經濟預測理想，以及減息幅度又大，有機會出現夾淡倉情況，因此，文錦Sir建議短期唔好跟沽，雖然好倉同淡倉期貨合約相差1.3萬張唔算好多，不過，一旦增至2萬至3萬張，殺傷力就會好大，所以應該觀察市場會唔會出現夾淡倉情況再作決定。
