【Now財經台】截至早上11時止，過去1小時內《彭博》用戶搜尋量最多港股，依次為復星國際(00656)、九龍倉置業(01997)、新奧能源(02688)、佳兆業集團(01638)及長實集團(01113)。
近日復星有收購消息，新加坡房地產投資公司凱德投資(Capital Land Investment)收購集團旗下，法國豪華連鎖度假村Club Med約20%至30%股權，早前市傳Club Med估值約8億美元，以出售30%股權計，套現約19億港元，似乎都幫唔到復星系好多？連同直接持有Club Med係復星旅遊文化(01992)，雖然兩隻股份都有得升，但投資價值係咪始終唔大？
富途證券首席分析師譚智樂指，減債係復星依家首要任務，單靠呢筆錢一定唔可以解決債務問題，所以唔可以將呢單收購消息視為一個利好因素。對復星而言，起碼要見到整個債務問題解決，或要有更多資金，先可以令市場有返信心，繼而提升估值。
Arnold建議，一般投資者唔好吼呢啲板塊，因為未能確認收購消息嘅真實性，加上有可能涉及債務重組。佢補充，有貨嘅投資者喺復星國際唔跌穿3.8元嘅情況下可以繼續揸住，因為股價有可能被過分低估，但冇貨想依家買入風險就太高。
