【Now財經台】馬可數字科技(01942)宣布配股協議失效後1個交易日，迅即「捲土重來」，集團宣布以每股0.53元，向唔少於6名承配人，配售最多1.55億股，配售價較昨日(16日)收市價，折讓逾14%，馬可數字科技股價今日(17日)受壓，跌近5%，低見0.59元，跌至3年低位。
其實上次計劃配股時，公司曾下調配售價，但上周五(13日)仍宣布因無法落實潛在投資者，配股協議宣布失效，今次「捲土重來」再下調配售價至0.53元，集資額亦由1.37億元縮至8200萬元，雖然配股價一減再減，但最終可唔可以落實配股計劃仍然係未知之數。
