【Now財經台】仙股利時集團控股(00526)股價今日(16日)一度飆逾73%，高見0.13元，由仙股升格變毫子股，事源公司獲Manukura Limited(CMCI)溢價入股，將會向CMCI發8億股認購股份，每股0.076元，集資約6000萬元，認購人CMCI由Alexia David全資擁有，後者係喺倫敦上市嘅可口可樂希臘瓶裝(Coca-Cola Hellenic Bottling Company AG)創辦人，已故嘅Andrew A. David女兒，利時今次係咪泊到大碼頭？依家係咪入貨好時機？
《香港股票財技密碼》作者梁杰文指，通告上刻意介紹認購人背景，唔少投資者都畀可樂呢個字眼吸引，利時股價今日爆升前，市值僅約10億元，一間市值細、業務唔顯眼嘅公司，突然畀大人物睇中入股，一定令市場有憧憬。
Mike又話，一家公司業務喺西歐，另一家就喺內地，雙方未必會有合作，但業務上仍有合理憧憬，雖然認購人喺家族公司冇實質職位，但對利時嚟講，就多咗1個打開西歐市場嘅門路。
佢建議，投資者應該靜觀其變，因為今次入股金額唔大，未來要留意利時營運方針有冇改變，甚至恢復派息，雖然股價今日借消息喪炒，但相信中長線好快會回落至低水平。
