【Now財經台】美國減息周期即將展開，唔少定期存款利率都開始少過4厘，食息一族可能覺得唔吸引，睇返過往嘅減息周期，都會利好股市表現，因為企業借貸成本低咗，亦降低冇風險利率，提升高息股估值，睇返港股，依家部分高息股嘅股息率超過4厘，買高息股收息係咪一個好選擇？高息股又應該點揀？
獨立市場策略師何啟聰指，買唔買高息股要考慮兩個因素，首先係股息嘅持續性，要睇來年仲可唔可以派高息，如果之後經濟放緩，公司賺少咗，可能會削減派息，其次要小心賺息蝕價，要特別小心股價波動性較大嘅股份。此外，若內地經濟下行及美國經濟衰退同時出現，買高息股都未必穩賺。
至於點揀高息股，何啟聰建議留意內地電訊及內銀股，因為呢類股份持續派息能力相對較高，反觀資源及金屬股價格較波動，因為中美經濟放緩會直接影響商品相關股，而股價跌幅及盈利波動性亦較大。
