【Now財經台】中國創新投資(01217)認購易生活控股(00223)逾16%股權，會成為易生活最大單一股東，易生活向中國創新投資配售2.26億股新股，佔易生活擴大後股本大約16.66%，配股價0.123元，較上周五(13日)收市價折讓約12%，集資淨額逾2700萬元。
易生活股價今朝(16日)大幅低開逾19%，一開市已失守配股價，其後跌幅一度擴大至近36%，低見0.09元，但之後一度有逾90%主動買盤，帶動股價跌幅顯著收窄，截至早上1時止，成交股數較過去100日同時段平均增逾5倍。
易生活前身係資源股神州資源，易主後改名變身電商股，雖然公司積極發展唔同業務，又同唔同公司合作，但似乎成效唔大，2016年變身後年年都蝕錢，公司業務唔掂，股本融資活動又多，近年甚至出現內鬥，散戶似乎無謂火中取栗。
