【Now財經台】受颶風弗朗辛(Francine)吹襲影響，市場擔心會影響美國石油生產，油價連升兩日。中國海洋石油(00883)昨日(12日)除淨，今日(13日)已連升第2日，不過，中海油亦係資金流出第2大個股，雖然昨日開始有好友入場，但消息面好壞參半，因為國際能源署(IEA)下調明年石油需求增長預測，如果想短線博反彈，應該點部署？
法興銀行證券上市產品銷售部董事周翰宏指，近期油價跌穿重要支持位，觸發一輪調整，雖然走勢轉弱，但仍然唔算差，資金以部署博反彈為主，而20元水平會成為今輪反彈嘅重要關口。
資金流方面，Horace就指，流出嘅資金可能之前持有唔少貨，但股價跌勢令資金要離場止蝕，中海油股價今日反彈，吸引少量資金開始做博反彈部署，又指用窩輪做部署較合適，行使價19元至20元輕微價外條款較合適。
