【now.com財經】噚日揀咗隻恒指牛(66846)出嚟，喺上半場11點半左右見指數上到1730X點，即到咗小時圖拉出嚟嘅目標線之後，(66846)平均即食13.5格或26.47%。
喺下半場見指數再次衝上17,300點，見到咁嘅情況可能會揼_隻(66846)食早咗，但如果見到再之後指數上到17,334點日內高位後向下回返落17,259點收市，應該都唔會覺得自己蝕得太多。
Anyway，食幾多著幾多都真係有時整定；強求都唔係一件好事。實不相瞞，我老爸係位風水師，佢話最好嘅命水唔係啲乜嘢大富大貴，而係所有嘢都係平平穩穩，因為個天係好公平，比得你呢樣嘢好，一定會拎走你另一樣嘢。呢番說話我好細個就聽教，引伸至今，做人嘅嘢唔好貪，要學懂滿足。(更何況噚日執26%都唔算數少啦，吓話)
不過今朝見到牛熊證街貨圖，就知貪心嘅人一街都係，指數卡住喺250線，而指數又企喺牛熊街貨中間位，但目測+心算計過，以掂到重貨區為目標的話，似乎上行殺熊有較大著數。
所以作戰室今日都喺U盤時準備定好倉，及至開市後首五分鐘，戰友借住嗰支「大陽燭」爆上先食咗個早餐落肚。
小時圖上見指數好早已經又上到另一條頂線，係呀，指數由底上返去嘅中途一定會遇到好多線，但唔緊要，我哋執嘅就係線同線之間嘅位置，去到線之後就收割，翹埋雙手等睇佢破定唔破。10點未到，破埋。
依家只係9點57分，連17,500點都到埋，首兩層熊證全數被收回，呢度有相當於604張期指。
10點後見指數企喺小時圖嘅量度線之上，保歷加通道口有見拓闊，Slow STC(14.3)兩線再上多次到超買位，係有出超買再超買嘅條件，不過就要靠保歷加口一定要保持拓闊。
換平均線亦見100/150線目前夾住指數，少少動彈不得。
至於喺五分鐘圖上見到嘅情況都差唔多，Slow STC(14.3)同指數都係靠住保歷加通道口拓闊先至再有得上。但都係嗰句，今日咁抽得走嚟捉轉角真係有難度，喺10點高位出「射擊之星」至依家10點9分都未見指數下行，出淡倉都要抱住一個勿衝動嘅心態。
加多少少耐性等等10線守得住嘅話，恒指牛(69412)，收回價17,100點，同現價有約400點距離，槓桿約34.95倍都夠做Day Trade，爬格仔mode+小注策略，記得踩好線先去呀~
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
