【Now財經台】截至早上11時止，1小時內《彭博》用戶搜尋量最多嘅港股，依次為中國海洋石油(00883)、美團(03690)、比亞迪股份(01211)、龍湖集團(00960)及華晨中國(01114)。
美團股價今日(12日)升得唔錯，更成功突破阻力，一度升逾4%，高見124.9元。評級機構惠譽日前調高美團評級，話反映集團盈利能力顯著提升，同埋自由現金流強勁。此外，有報道指，美團旗下KeeTa宣布進軍沙特阿拉伯市場，股價係咪有望更上層樓？
椽盛資本投資總監曾永堅指，美團股價已突破短期阻力122元，主要係第2季業績遠好過預期，證明管理層近年重整經營戰略，以適應內地消費降級，提升自身競爭力，甚至喺行業中築起「護城河」，因此，市場對美團未來盈利增長睇法樂觀，因而上調美團估值，相信可吸引中長線資金入市，股價短期仲有上升動力。
此外，美團進軍沙特嘅消息係另一個股價催化劑，之前KeeTa登陸香港，成功搶佔市場份額，已是一個成功例子，所以市場對美團進軍中東市場睇法正面。
