【Now財經台】華為用嚟硬撼蘋果公司(Apple Inc.)iPhone 16系列嘅三摺機「Mate XT非凡大師」，銷售愈戰愈勇，截至昨日(11日)下午止，已有逾500萬人預約搶購，呢部機將會喺下周五(20日)正式開賣，首發價19999人仔起跳，有兩種顏色選擇，分別係「瑞紅」及「玄黑」。
股票市場冇晒鑊氣，但「Mate XT非凡大師」就掀起炒風，據內媒報道，網上二手平台有唔少銷售Mate XT嘅Po，炒價介乎3萬至16萬人仔。
值得留意係，雖然預約反應火熱，但唔需要畀訂金，所以最終有幾多人「走數」仍然係未知之數。
花旗都畀咗個「溫馨提示」大家，Mate XT打開後，個Mon約10.2吋，明顯大過主流摺機嘅7.6至8吋，機身亦偏重，約298克，手機摺埋之後，厚度約12.8毫米，比其他主流機厚。
