【Now財經台】美股昨晚(11日)勁Chok，其中，道指一度暴瀉逾700點，但收市升逾百點，標指及納指收市都有得升，市況大幅波動可能同美國總統大選電視辯論有關，據美國唔少民意調查顯示，賀錦麗(Kamala Harris)表現較特朗普(Donald Trump)好，令民主黨取得領先優勢。政策方面，共和黨傾向減稅，民主黨就傾向針對富人或大企業加稅，對企業盈利有幾大影響？選情又點影響美股？
東亞銀行財富管理部首席投資策略師李振豪指，兩黨稅項相關政策取向一直好鮮明，喺今次電視辯論中，賀錦麗一直攻擊特朗普嘅觀點及弱點，但亦冇提出實質嘅治國方針，喺投資角度嚟睇，邊個勝選美國經濟前景仍然唔明朗。
佢又話，特朗普執政期間利好科技、非必需品及醫療護理等板塊，若賀錦麗延續現任總統拜登(Joe Biden)嘅執政方向，而美國總統拜登(Joe Biden)喺執政期間，科技、能源、金融股表現較好，兩黨利好嘅板塊南轅北轍，只有科技股相同，因此，無論邊個勝選，科技股喺兩黨政策中都會佔優，所以昨晚大市回調，資金都冇大手離場，反而補飛落科技股。
