【now.com財經】噚日揀咗隻恒指熊(69319)出嚟，平均買入價為0.042元，計劃借小時圖唔過頂線向下再落去殺牛；反方向借五分鐘圖中軸+保歷加通道口拓闊作為散水訊號。
噚日比較早出文，皆因都想可以比定啲位睇文嘅你袋住先。下半場開市之後見到指數有咩唔對路，或者hit到散水訊號嘅話，咁都可以搵定位走人。
及至噚日下半場開市10分鐘都唔夠，指數已經率先上返去中軸以上水平，而當時未見保歷加通道口拓闊，所以(69319)都仲未觸發到散水訊號。
指數之後再沉返落去日內低位16,97X點呢啲位置，擺位上都處於中軸線以下，但就係未掂到保歷加通道底線，連Slow STC(14.3)兩線都未到超賣位。吽咗20分鐘之後見指數嚟多次上中軸，剛好亦都係2點，換一換個小時圖見，大獲！Slow STC(14.3)率先出咗觸底，由於(69319)係借小時圖嚟做Trade，只係將量度線咬返緊少少所以先搭埋個五分鐘圖出嚟，但小時圖都率先見觸底喎，比起五分鐘嘅散水訊號嚟得更深，所以(69319)都宜先行告退。
如同平時一樣用10分鐘時間走貨嘅話，期內(69319)高低位做過0.045元/0.043元，平均走價貨為0.044元，平均執返兩格或4.55%。
今次都總算還得神落，皆因之後連五分鐘圖嘅保歷加通道口都拓闊，指數向上飆高至17100點樓上，(69319)莫講話有兩格執，倒輸入肉呀大佬。
隔晚Nvidia(NVDA)發威，戰友們夜場喺chatroom繼續玩到好似夜總會咁一齊出晒Call。而今朝見恒指開升68點之後，計過度過都係比好倉出先，到依家9點45分，指數高位暫見17,239點，同目標價(噚日下跌裂口頂部17,243點)爭4點；係呀，作戰室嘅好倉又玩完啦。
今日小時圖都真係有啲驚喜。由9月到依家小時圖上見未曾企高於中軸嘅，今日一開市就企返上去比你睇，係有擔心會唔會得條上影線Hea、食詐糊架？10點後可能會再清晰啲。
留意埋小時圖嘅Slow STC(14.3)兩線處於中軸、保持指向超買位，恒指牛(66846)，收回價16,850點，同現價有約365點距離，約40倍槓桿夠做架啦，記得踩好中軸先至做呀；小心埋五分鐘圖嘅Slow STC(14.3)有似向住超賣落，借佢做一趟Swing Trade間間單單嘅話亦可。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
