【Now財經台】內衣股都市麗人(02298)上市10周年，集團早前公布中期業績時宣布恢復派息，派中期息1.1仙。睇返集團上半年業績，收入按年增長11%至逾15億人仔，純利大増.2倍，毛利率企穩於47.5%水平，不過，核心業務貼身衣物收入倒退近2%，係咪跑輸上半年內地社會消費品零售？
都市麗人副總裁兼首席財務官蔡瑋軒表示，集團核心業務貼身衣物會透過線上及線下渠道銷售，其中，線上電商銷售跌約9.1%，主要係以往線上銷售平台由公司自行經營，但今年上半年開始，就同其他電商合作，而聯營商品成交金額(GMV)約2.3億元人民幣，但唔計入收入，而係從中收取服務收入，所以公司嘅核心業務其實做得唔錯。
此外，面對內地消費降級及行業競爭激烈，雖然都市麗人係一個大眾化品牌，但係咪都要做多啲推廣、提供折扣，甚至減價，以提升銷售及市場份額？蔡瑋軒指出，集團著力點唔係降低零售價格，反而係提升品牌，最新同國家花樣游泳隊合作，佢哋喺今年巴黎奧運攞咗兩面金牌，令集團品牌提升咗唔少。
