【Now財經台】美國總統大選重頭戲今朝(11日)上演，代表民主黨出戰嘅現任副總統賀錦麗(Kamala Harris)，硬撼前總總、代表共和黨出選嘅特朗普(Donald Trump)，進行兩人首場亦可能係最後一場辯論。美股3大指數昨晚變動唔大，似乎都係觀望緊呢場辯論，值得留意係，有「恐慌指數」之稱嘅VIX指數昨晚略為回落，而部分資金似乎轉投債市，依家美股嘅風險胃納有冇因為呢場辯論而轉變？兩黨嘅稅項政策對企業又有咩影響？
潤淼資產管理董事盧志威認為，喺市場缺乏焦點下，呢場辯論有可能令市場波動，而相關板塊或會因應兩人表現而有郁動，此外，由於美股仍有唔少不確定性，依家最明朗係賭美息向下，而經濟數據差會令加息步伐及幅度快啲和大啲，由於唔知應該點部署，所以資金就流入債市避險。
佢又話，民主黨主張向大企業及富人加稅，對股市嚟講長遠一定係利淡，加稅會令唔同範疇嘅動力減弱，雖然特朗普主張減稅，但都會有其他影響，所以投資者可能會選擇喺大選前放假，勢令市場變得波動，由於風險大咗，呢段時間宜減少注碼。
